SIN NOTICIAS DE GURB

Esta novela de Eduardo Mendoza publicouse por entregas no diario El País durante o verán de 1990 e recuperaba así a vella tradición da "novela folletinesca" do século XIX. Ao ano seguinte publícase xa como libro.

A obra relata as aventuras dun extraterrestre na cidade de Barcelona en busca do seu compañeiro Gurb, quen, tras adoptar a apariencia de Marta Sánchez, deixa de enviarlle noticias.

Consta de 15 capítulos en forma de diario, redactado como os informes de ciencia-ficción. Eduardo Mendoza parodia así as historias documentadas das novelas de ciencia-ficción e pretende dar a sensación de que as descricións que fai o extraterreste son obxectivas e verosímiles.

Ademais do castelán, na novela aparece outro código de comunicación: a linguaxe en clave dos extraterrestres, formado por letras, números e signos sen orde nin significado.

Nesta novela Mendoza leva ata os últimos extremos o seu gusto pola crítica paródica (burlesca e irónica), rozando o humor absurdo.

Unha lectura interesante e divertida.